YADDASHLARIM
|
دئدیم :« مسعود! اولماز کی قادیندا غاوواض اولوب جومماق اوءیره نسین!؟» گولدو:« هانسی قادین اولا؟!» دئدیم:« اوره ییم ایسته ییر سنله گله م !» لیباسلارین گئیدی. دنیز دالغالی ایدی. دئدیم:« کئشکی بوگون گئتمییه سن! دنیز لپه لی دی!» اللرینی اللریمه آلدی. دئدی:« گل گئده ک بیرآز قمیشلیکلر دالیندا گزه ک!» سحر چاغی ایدی! گونش هله چیخمامیشدی. آیاقلاریمیزین ایزی دنیز قیراغینین قوملاری اوستونده گوءرونوردو! دنیز قوشو باشیمیزین اوستونده اوچوردو! دئدیم:« نده نسه سن هر یانا گئدیرسن ، بو قوش سنله گلیر؟» اللریمی اللرینده سیخدی. دئدی:« پاخیللیق ائدیرسن؟!» دئدیم:« بلکه!» منه باخیب دئدی:« منیم اوره ییم سنیندی.» دئدیم:« اینانمیرام!» بیرآن یئرینده دوروب شککی ایله باخیب دئدی:« سنده ن سونرا ...!؟» باشیمی توولادیم، بیر دامجی یاش گوءزلریمده ن دامدی. سوروشدو:« کیم؟» دئدیم:« دنیز!» و آغلادیم. ساچلاریمی تومارلاییب دئدی:« سنه بیر دولو مورواری گتیره جه یم!» دئدیم:« سن اوءزون مورواریسان!» منه باخدی. آنام اللرینده بیر لیوان سو باشیمی قووزادی. حیدر دئدی:« اون ایلدیر کی سنین عئشقین ائله یوخومو گوءزلریمدن آلیبدیر!» آتام دئدی:« حیدر سنه یاخشی یولداش اولا بیلر!» باغیردیم! سوقابی آنامین الینده ن یئره دوشدو. سهیل ایله چیچک باغیردیلار. حیدر دئدی:« نه دئسه ن کبینینه یازدیراجاغام. نه قده ر مورواری دئسه ن آیاقلارینین آلتینا توءکه جه یم. آنجاق منی اینجیتمه.» آنام دئدی:« الله ها خوش گلمز، حیدر یاخشی جاواندیر. مسعودون ایسته یینی سنین اوره یینده ن چیخاردا بیله ر!» دئدیم:« مسعود! سنسیز هر یئر قارانلیقدیر.» بیر نارینج گولو اللریمه وئریب دئدی:« دنیزده جومان کیشی یه دنیزده ن اوزاق دوشمه ک قارنلیقدیر!» بیر شئی اوره ییمده سیندی! باشیمی آشاغا سالیب ایختییارسیزجا آغلاییب دئدیم:« کیشی لر هامیسی دلی دیلر، رحم ائتمه زلر» قوملارین اوستونده اوُتوروب منی اوز به اوزونده اوُتوردوب دئدی:« اَیه ر ایسته سن گئتمه ره م .» دئدیم:« بیلیرسن کی گئتمه یینه دوءزه بیلمه ره م! سانکی قالماغینادا!» قوملاریلا اوُیناییب دئدی:« نده نسه منیم اوره ییمه شور سالیرسان!» دئدیم:« ائله منیمده اوره ییم نیگرانلاشیب!» دئدی:« من جوشغون دنیزی سئوه ره م!» دئدیم:« آما دنیزین ایچرینده راحاتلیق دیر!» آنام دئدی:« قوربان اولوم سنه اَل آیاغین ایستی دی، گَل بو سویو ایچ!» حیدر قادینلار کیمی حزین حزین آغلاییردی ، اوجادان دئدی:« نذیر ائدیره م اَیه ر مستانا توختاسا بیر آی دنیز قوشلارینا بالیغ توتاجاغام!» اوره ییم قاخدی! اوتاخ باشیما دولاندی! آنام دئدی:« یا قمر بنی هاشیم دادیما یئت!» ایچه ریم بیر بیرینه دولاشدی. دوقتور دئدی:« تزه لیگده بیر حادیثه باش وئرمه ییب کی!؟» آنام آغلاییب دئدی:« اوشاغیم ساغ سالامات بیر دسته گول ایدی! ایکی گون بوندان اوءنجه ایکیمز کیلیم توخویوردوق!» دوقتور حیدرده ن سوروشدو:« بیر شئی کی یئمه ییب؟!» حیدر دئدی:« یوخ آغا! ائله همشه لره تای!» چیچکله سهیل یاواش یاواش آغلاییردیلار. مسعود دئدی:« بو گوءز یاشلاری منی دلی ائدیر، آغلاما مستانا!» دئدیم:« گلیب قاییغیندا اوتوررام، سن کی دنیزه جومدون قاییق دان موقایید اوللام، قوول وئریره م کی موزاحیم اولمایام.» دئدی:« دنیز سفری چتیندیر، کیشی لر اوچوندور!» دئدیم:« قوول وئریره م ، آتدیم آتدیم سیزیله گلره م .» سوروشدو:« جومماق باجاریرسان؟!» دئدیم:« یوخ! آخی اونو اوءیره نمه یه بیر یئر یوخ ایدی!» دئدی:« ایه ر دنیز دالغالی اولسا قاییق سویون آلتینا گئده ر. سن کی دالغالاردان قاچانمازسان!» حیدر دئدی:« داها قویمارام دنیز قیراغینا گئده سن. بئش ایلدی دوءزموشم ، داها دوءزه نمه ره م!» دئدیم:«حیدر! دنیز منیم اومودومدور!» دئدی:« ائله سنین قافان یالنیز دنیز قوشوندادی.» دئدیم:« مسعود! او قده ر دنیز قوشونا باخارام کی قاییداسان!» مسعود دئدی:« دنیز قوشو یالنیزدی!» دئدیم:«ناصیر! مسعود یالنیز دنیزه گئتدی؟!» دئدی:« سگکیز گون سویون اوزونده یدیک، مسعودون حالی خوشویدو، دوققوزونجو گون دنیز دالغالاندی. مسعود سویون آلتینا گئتدی، قاییق سیندی، من اوءزومو سویا آتیب داها مسعودو گوءیمه دیم.» اوءزومو سویا آتدیم. حیدر دالیمجا قاچدی! منی شپه لرده ن ائشییه چیخارتدی! الینی دیشله دیم. اللری اوءلو قوخوسونا بئلنمیشدی! قاچدیم قمیشلیکلره ساری. یاغمور یاغیردی، لیباسلاریمدان سو دامیردی، قمیشلیک چوخ ساکیت ایدی! دیزی اوسته چوءکوب یئره اوتدوم. سونرا باغیردیم:« مسعود!» دنیز قوشو باشیم اوستوندن گئچدی. اَییلیب مسعودون آیاق ایزلرینی اوءپدوم. آیاق ایزلرینین یئری نارینج قوخوسو وئریردی. باتلاقا دوشدوم. بالیقلار منه ساری هوجوم گتیردیلر. دنیز قوشو سینه م اوسته اوتوردو. خییال دوورالارینین دالداسیندان بیری منی چاغیردی:« مستانا!» یئل اسیردی و قمیشلر اویناییردی! حیدر منی موءحکم باغرینا باسدی. آنام باشینا چالیردی. اوشاقلاری اوتاقدان ائشییه آپاردیلار. دوقتور بیر ایینه ویریب دئدی:« تَشننوج ائدیب.» آتام جیغالا چکیردی. دئدیم:«آتاجان! مسعودون ایسته یی هئچ دوءنه منیم اوره ییمده ن ائشییه چیخماز، قویما بیر عوءمور قارا بخت یاشاییم!» حیدر دئدی:« سنی خوشبخات ائده جه یم مستانا!» دئدیم:« آناجان! منیم عشقیم اوءلمه لی دئییل.» دئدی:«مستانا! بونلار هامیسی اوشاقلیق روءیاسی دی! یاشاییشین آلچاق اوجاسی چوخ اولار! مسعود دا راضی دئییل کی سن عوءمرونون سونونا ده ک دول یاشایاسان! هر قادینین بیر اَری اولمالی دی، ایکی گونده ن سونرا اوشاقلار سنی دوءوره سه لر هر زادی یاددان چیخاردارسان!» دئدیم:«حیدر! من سنله یاشایارام، اوشاقلارینی بوءیوده رم ، آما منیم اوره ییم یالنیز دنیزده دیر!» دئدی:«سن منیم اول ، اوره یین هر یاندا اولورسا، اولسون!» دئدیم:«آتاجان! منی ایسته مه دیییم ایشه مجبور ائتمه یین!» آنام دئدی:« یاخشی سی ائله بودور!» یئنی ده ن منی چاغیردی:«مستانا!» سس، نارینج گولونون قوخوسونو وئریردی. قمیشلیکلرده یئل دولاندی. دئدیم:«مسعود! سیز کیشیلر هامینیز رحیم گویولوز یوخدور!» اوزاقلارا باخیب دئدی:« دنیز کیشیلرده ن رحیم گوءیولسوزدو!» دئدیم:« سن قاییدینجا روزگار منه چوخ چتین اولاجاق!» دئدی:«دنیز قوشو بیر ایل دیرکی سئوگیلیسین الده ن وئریب، بیر باخ گوءر نئجه غملی اوخویور!» دئدیم:« اوره ییم اونا چوخ سیخیلر!» دئدی:«عشق اوچون ائله یانماق دا وار» سونرا اوتوردو قوملارین اوستونده پورتره پارچاسینی اوءنونده ساخلاییب جیزیقلادی دئدی:«مستانا! مجنونون قوشونون حیکایه سینی ائشیدیبسن ؟!» قاش گوءزومو قیوریدیب او سوءزونه داوام وئردی:«مجنونون قوشو مجنونلا برابر گئده ردی» حیدر دئدی:« یاشاییشیمیزی بیر بیرینه ویریب ، اونو اولدوره جه یم.» آیاقلارینین آلتینا دوشدوم:«دنیز قوشو منیم تام اومودومدور!» اوزومه بیر سیلله ویردی:«یالنیز قادینین اومودو کیشی سی دی!» آغلاییب دئدیم:« حیدرجان! آند ایچیره م بوندان آرتیق سنه محبت ائده جه یم، اوشاقلارا یئتیره جه یم، نه ایسته رسه سنه یئمک پیشیریب هر نه امر ائتسه ن یئرینه یئترره م ، یالنیز نه اولار اونو منیم الیمده ن آلما!» دئدی:« مه یه ر بو پورتره نی دوواردان ائندیره سن!» دیل دوداقیم اسدی:« بو پورتره مسعودون اولماغینی منیم اوره ییمه سالیر!» قاپینی بیر بیرینه چالیب دئدی:«لامصب من سنین کیشی نم!» دئدیم:« سنی ائله بیر کیشیم کیمی سئویره م .» دئدی:«آما من سنین تام اوره یینی ایسته ییره م.» یئنی ده ن اوره ییم بولانیب یئریمده داشلاندیم، بدنیم باشدان باشا اسیردی. حیدر اَل آیاقیمی توتموشدو. دوقتور دئدی:«غریبه ایشدیر! بو ایینه نی کی ویردیم چوخ ایی ایدی.» حیدر قادینلار کیمی حزین حزین آغلاییردی! دئدیم:« مسعود جان! اوقده ر بو قوشا باخارام کی سن گله سن!» دئدی:«سنین عشقین منی یاندیریر.» دئدیم:«من سنین یانماغینا دوءزه بیلمره م .» حیدر دئدی:«من دوءزه بیلمیره م، نییه قانمیرسان!» دئدیم:«سن بیلیردین کی منیم اوره ییم بیر آیریسینین ایدی!» حیدر دئدی:«بئش ایل گئچیب داها بسدیر!» دئدیم:«اَیه ر اوءز اَلیمده اولسایدی باشلامازدیم!» اوتدوم قوملارین اوستونده، چیچکله سهیلی یئرده یاتیدیب اونلارا ساحیللرین قمیشلرینده ن بیر گوءلگه تیکدیم! گوءلگه لیک نارینج گولونون قوخوسونو وئریردی. دئدیم:«مسعود جان! همدرد اولماق اینسانلارین دوغرو باغلانیشیدی.» دئدی:«دنیزلر قوشو یالنیزدی!» دئدیم:« ائله ده بس دنیز قوشونون اوچماسی دا قاعیده سیز دئییلدی!» گولومسه ییب بارماقلاریمداکی آداخ اوزویونو اوءپدو! دئدیم:«حیدر! سنین آروادین اوللام، آما مسعودون اوزویونو بارماقیمدان چیخاتمارام.» دئدی:«من سنی ایسته ییره م، مسعودون اوزویو سنین!» دنیز قوشو چییینلریمده اوتوروب منه ماهنی اوخودو، اونون سسی ده نارینج گولونون قوخوسون وئریردی. ساچلاریمی یولدوم، باغیردیم، آنامسا آغلادی، حیدر باشینی دووارا چالدی. دوقتور یئنی ده ن بیر ایینه ویردی. دئدیم:«حیدر! دنیز قوشو منیم یالنیز اومودومدور» دئدی:«اَیه ر او اولماسا، یالنیز حیدر سنین اومودون اولار!» آیاقلارینی اوءپدوم. دئدیم:«دنیز قوشو کی سنه زحمتی یوخدو، سنله ایشی یوخدو.» دئدی:«سنین تام فیکرینی اوغورلاییب.» دئدیم:«عشقیده ن اوزاخسان حیدر!» یئنی ده ن منی چاغیردی:«مستانا!» دئدیم:«مسعود جان! منیده اوءزونله آپار!» پورتره پارچاسیندا شکیل چکیردی، دنیز دالغالی ایدی. دئدیم:«دئیه سن منیم اوره ییمی چکیرسن!» دئدی:«من دالغالی دنیزی سئویرم.» دوقتور دئدی:«دیری قالماز!» آنامسا آغلایا آغلایا دووارداکی پورتره نی گوءتوروب باغرینا باسدی. پورتره نارینج گولونون قوخوسون وئریردی. مسعود اللریمدن یاپیشیب دئدی:«گل دنیز قیراغیندا برابر قاچاق.» دنیز قیراغی چوخ خلوت ایدی. دنیز آما دالغالی ایدی، یاغیش یاغیردی. لیباسلاریمدان سو دامییدی. قاچدیم، منده ن قاباغا گئچدی. دئدیم:«دوز دئییل سنین آدلیملارین یئکه دیر.» تاودان دوشوب اللریمده ن یاپیشیب دئدی:«برابر قاچاریق.» دنیز قوشو باشیمیزین اوستونده اوچویدو. حیدر گولدو. بیر الینده تاپانچا بیر الینده ده دنیز قوشو. اللرینده ن قان دامیردی. دئدیم:«حیدر! کافتار ایی وئریرسن!» قاه قاه گولوب دئدی:«سنله مسعودون باغلانیش وصلینی قیردیم، اوءلدوردوم!» یئنی ده ن گولدو. ایسته دی منی قوجاقلاسین. دنیز قوشونو الینده ن آلیب ساحیله دوغرو قاچدیم. یاغیش یاغیردی. لیباسلاریمدان سو دامیردی، دنیز قیراغیندا هئچ کیم یوخ دنیز دالغالی ایدی. حیدر ده دالیمجا قاچیردی. دئدیم:«مسعود جان! گَل بودا سنین!» دالغالار اونو اوتدو! حیدر گولدو. اَیییلیب دیزه ایسته چوءکوب قان ده نه لرینین ایزینی اوءپدوم. قوملار نارینج گولونون قوخوسون وئریردی. دوقتور دئدی:«بیر تیکه پارچا آغزینا قویون، قورخورام دیلینی تیکه تیکه ائده!» آنامسا دئدی:«حیدرآغا! منیم قیزیمین باشینا نه بلا گتیردین؟!» حیدر باشینی دووارا ویریب دئدی:«خانیم جان! من اونو سئویره م ، عشقیم کیمی اونو عیبادت ائدیره م!» مسعود دئدی:«اَیه ر ایسته رسه گئتمه ره م.» دئدیم:«عاشیق گوءنلونده سئوگی ایسته یی عشقیده ن اوءستوندور! گئت آلله آمانیندا!» آتام دئدی:«اینات باز قیز!» دئدیم:«آتاجان! کیشی لر عشقی ایله موعامیله ائده رلر!» آیاقلاریمی یاتاق تاختاینا باغلادیلار. دوقتور باشیمین اوستونده دورموش ، دامیمیزدا دامیردی. یئنی ده ن منی سسله دی:« مستانا!» سس نارینج گولونون قوخوسون وئریردی.
|
About
منیم شعرلریم
Home
|
