بیرده ن بیره بیر سس ائشیتدی، دئیه سن قاپی آچیلمیش بلکه ده آشاغی داکی قونشو ائشییه گئدیردی، آما هله سحر آچیلمامیشدی! سونرا بیرجوت آیاق دؤیونتوسو یاخینلاشمیش اونون اوره یی اوجادان تاپتاماقا باشلادی، آیاق سسلری اتاق قاپیسینین دالیندا دورموش سونرا قاپی نئچه بارماقلا چالیندی ، دئیه سن هر طرفدن قورخو هوجوم گتیرمیش یاواشجا یاتاق یئریندن دورموش شالوارینی گئیمیش قاپی دالیندا یاواشجا سوروشدو: « کیمدی؟!» بیر نازیک و ایستکلی سس جاواب وئردی:« منم! مه یه ر منی اینتیظار چکمیردین؟!» جاوان کیشی دئیه سن ایللر بویو اونو تانیمیش قاپینی آچدی، گؤزلری یاشلا دولموش اوره یی ایسته ییردی دیزه اوسته چوکوب آغلاسین! قاپی ائله اوجور آچیق قالمیش و بیرجوت آلا گؤز ایچری گیرمک حالیندایدی! بیرده سوردو:« منی ایچری چاغیرمیسان؟!» جاوان کیشی ال آیاقینی ایتیرمیش بلکه ده اونون گؤزلرینده ایتمیش قاپی اوزه رینده ن قیراغا چکیلمیش، اودا ایچری گیریب قاپینی دالیجا باغلادی! هئچ بیر شئی اللرینده یوخ ساده و جانتاسیز گلمیشدی، یالنیز بیر جوت آلا گؤز گتیرمیشدی! یاتاق تختینده اوتوروب سونرا دئدی:« مه یه ر منی اینتیظار چکمیردین؟ ایندی گلمیشه م ، ایسته میرسن دانیشاسان؟» جاوان کیشی ائله اجور آیاق اوسته دونموشسا اینانا بیلمیردی، آما اونو ایستکلی سی سانیرسا سوروشدو:« نه زامان گلدین؟ مه یه ر دئمه میشدیم گلمه میشدن اؤنجه منه خبر وئر؟ گئچه ن دوءنه ده ائله بوجور ناغافیلدان گلمیشدین، منده سنی ایله ساواشدیم، سونرا سن کوسوب گئتدین، داها قاییتمادین!» جاوان کیشی ائله دال با دال اوره ک سؤزلرینی دئییرسه اودا ساکیتجه باخیردی ( سن گئده رسه اونون صاباحی درگی ساتان دکه سینه یاخینلاشیب، درگی ساتانا دئدیم ایسته ییره م بیر آگهی وئره م ! درگی ساتان دئدی : کیمه؟! من دئدیم: بنؤوشه اؤلومونو! درگی ساتان تاسوفله منه باخیب درگی لری قاباغیما سردی! منده اونلاری واراقلاییب بیرده ن گؤرودوم یوزدون آرتیق درگی نی جیرمیشام، درگی ساتان اؤفلکه لنمیش درگیلرین پولونو ایسته دی منده پارام یوخسا منی ایت کیمی ایشله مه یه مجبور ائتدی، اونون درگیلرینی ییغیب ، دکه سینی یویوب تمیزله دیم، اودا هر دؤنه گوله گوله دئییردی: ایندی کی بنؤوشه لرین اؤلوم فصیلی دئییل، بنؤوشه لر هله تزه یوخودان اویانیللار آی اوغلان!) جاوان کیشی داها سؤزونه داوام وئره بیلمه دی! بوغازی قاووشوبسا آز قالدی آغلاسین! سونرا یاواشجا دئدی: « اوندا سن بنؤوشه لرین اؤلوم فصیلینده منی یالنیز بوراخیب گئتدین!» اودا سوزولموش گؤزلری ایله جاوان کیشینین سرگردان گؤزلرینه باخیب، ائله گیسولارینی اونون گؤزلرینده بارماقلاریلا دارایارکن دئدی: « بو منیم ایسته ییم دئییلدی! او منی اؤزونه ساری چاغیردی!» جاوان کیشی دئدی: « سن گره ک گئتمییه یدین!» - :« نه اولوب ایندی ؟ گوروسن گلمیشم! اولار داها بوجور سینخینتیلی دانیشمایاسان؟!» جاوان کیشی آتوشگه دن ائشییه باخدی، هله ده نئچه اولدوز اونلارا باخیردیلار! آتوشگه نین اورتویونو بوراخیب گؤزلرینی اونون گؤزلرینده ساخلادی! اودا باشینی خجالتدن آشاغی سالیب، یاواشجا اونون یانیندا اوتوروب سونرا اللرینی اللرینده اریتدی. اونون اللرینده ساده جه دامارلارینیدا گؤره بیلردین، دئیه سن هله قان رنگینی گؤرممیش آینا کیمی ایشیق و دوریدو! سونرا اللرینی اوتوروب یادینا گلدی کی بیر دؤنه ده قیشدا درگی ساتانین یانینا گئتمیشدی، درگی ساتان اونو گؤره رکن دئمیشدی: « یئنه بنؤوشه اؤلومونو یئنی ده ن ایسته ییرسن چاپ ائده م !» اودا گولموشسه دئمیشدی: « یوخ! بنؤوشه اؤلومه داها یادلاردان چیخیب! ایندی گلدیم دئیه م نییه بس بنؤوشه اؤلومونو بئله بئواخت چاپ ائدیبسینیز؟!» سونرا بیر درگینی گؤتوروب درگی ساتانا گؤسترمیش کی اوندا یازمیشدیلار ( بنؤوشه اؤلومو- سینمالاردا ...) درگی ساتان ائله گؤروب گؤرمه میش اوجا اوجا گولموشسه اونو بارماقی ایلا گوستریب دئمیشدی: « دیوانه!» *** ایندی او اوزبه اوزونده دورموش گره ک اونا دئسین ایللر بویو اونو اینتیظار چکیردی، دوداقلارینی گولوشله ترپدیب دئدی: « من هر گئجه سنین گؤروشونه گلیردیم، آز قالیردی قبیر داشلاری دیل آچسینلار آما سنده ن بیر جاواب آلا بیلمیردیم!» اودا تبسومله دوداقلارین ترپتدی: « نییه! من هر یئرده سنله واریردیم! هله او لحظه کی درگی ساتان سنه دئدی دیوانه! هیرسده ن آز قالیردیم ارییه م !» جاوان کیشی ایندیسه تعجوبده ن یئرینده قوروموشدو. او آیاقی قالخیب اؤرتویو آتوشگه نین اوزونده ن قیراغا وورارکن ائشییه باخدی! سونرا اوزون دونده ریب دئدی: « بیلیرسن بو گئجه نییه بورا گلمیشه م ؟!» جاوان کیشی گولوب دئدی: « موهوم دئییل نییه گلیبسن! آز قالیردیم تگلیه دن باغریم چاتلایا، یاخشی اولدو کی گلدین!» او تعجوبله دئدی: « نییه! چوخ موهوم دی! » جاوان کیشی دئدی: « دئدیم کی موهوم دئییل! سن ایندی گلیبسه ن منیله برابر قالاسان! من ایله یاشییاسان! بیلمیره م نئجه سنده تشکور ائده م !» او ال آیاق چالیرسا چوخ چالیشدی جاوان کیشی یه ایسته یینی قاندیرسین: « نییه آنلامیرسان؟ من بو گئجه گلمیشه م سنی ده اؤزومله برابر آپارام!» جاوان کیشی سوروشدو : « هارا؟ بوردان دینج یئر هاردا وار؟!» او ایندی قاپینین یانیندا دورورموش یاواشجا نازیک سسی ایله دئدی:« ساعاتا بیر باخ! زامان دوروب! سن گره ک گله سن ، من گئدیره م !» جاوان کیشی ائله اوجور کی یاتاق تختینده یاتمیشدی آیاقا قالخدی اونلا گئتسین! سونرا ساعاتا باخارکن هله ساعات بیر لحظه ده ایشله مه میشدی! بیر آن اؤز جیسمینده ن آیریلماسینی حیس ائتدی ، ائله بیل جیسمینده ن آیریلیردی! نئچه آددیمدان سونرا باشی شیدده تله آغریماغا باشلادی! هله ده اؤزونون یاریسیی جیسمینده قالمیش ایسته دی قاییدسین آما داها بئواخت اولموشدو! *** جاوان کیشی ایندیسه آزادلیق احساسی ائتمیش قاپینی آچمامیش اونون قاپیدان ائشییه چیخماسینی گؤوردو! قاپی قاباغینا گلیب نه ایش گؤردو قاپی آچیلمادی، سونرا اؤزونو اؤنون کیمی قاپییا چالدی سونرا گؤردو کی قاپینین اوسایاغیندا دئیه سن هر زادی گؤروردو ، هله اؤزونوده کی یاتاق تختینین اوستونده اوزانمیشدی، بیرده ن یوخوسو یادینا گلدی، ایسته دی اونلا گئتسین آما او گئری دؤنرکن جاوان کیشی بوغازیندا قالاق قالاق هؤنکورتو اوره یینی بورودو، اونون سیماسی گوناهکار کیشیلره تای اولموش گؤزلرینین یئرینده ایکی درین ، قاپ قارانلیق قویو گؤرونوردو، ائله آتاسینین ناغیلیندا اولان دئولره تای! ایندی ایه ر قونشولار یوخودان اویانسایدیلار! 1378- تهران